Хүний анхдагч хэрэглээ болсон хүнсний бүтээгдэхүүнийг зөв нөхцөлд хадгалах нь чухал байдагтай адил, үйлдвэрлэлээс дэлгүүр хүртэл стандартын дагуу тээвэрлэх нь хүртэл хүнсний аюулгүй байдал, эрүүл мэндийн баталгааг хангахад чухал үүрэг гүйцэтгэдэг.
Бүтээгдэхүүний чанарыг алдагдуулалгүй тээвэрлэхийн тулд тээврийн хэрэгсэл нь хадгалалтын стандарт шаардлагыг бүрэн хангасан байх ёстой. Тиймээс түгээлт хийж буй тээврийн хэрэгслийг тогтмол сайжруулж, стандарт хангасан парк шинэчлэлийг тогтмол хийх нь үйлдвэрлэгчийн хариуцлага юм.
Үндэсний хамгийн анхны, хамгийн том цэвэр усны дагнасан үйлдвэр болох “Эм Жи Эл Акуа” ХК нь түгээлтийн автомашины парк шинэчлэлдээ тогтмол хөрөнгө оруулж ажиллаж буй. Тэд албан ёсны дистрибьютерээр дамжуулан үйлдвэрээс гарсан шинэ автомашинаар хоёр жил тутамд парк шинэчлэл хийн үйл ажиллагаагаа тасралтгүй сайжруулж байна.
Тодруулбал, өдөр тутмын чухал хэрэглээ болсон савласан цэвэр усыг стандартад нийцсэн тээвэрлэлтээр хэрэглэгчид хүргэхийн тулд Япон улсын Кавасаки хотод үйлдвэрлэсэн "Mitsubishi Fuso" брэндийн автомашиныг бүтээгдэхүүний түгээлтдээ ашиглаж ирсэн.
Энэ оны эхний улиралд тус компани дахин парк шинэчлэлээ хийлээ. Хүнс тээвэрлэлтийн чиглэлээр олон улсад тэргүүлэгч "Mitsubishi Fuso" брэндийн "Fuso canter" автомашиныг "МСМ Групп" ХХК-аас хүлээн авч, жолооч нартаа түлхүүр гардуулах ёслолыг гүйцэтгэв.
"Эм Жи Эл Акуа ХК-ийн дэд захирал Б.Бат-Оргил “Бид 2022 оноос эхлэн парк шинэчлэлийн чиглэлээр "MSM Групп" ХХК-тай хамтран ажиллаж байна. Тухайн жилдээ "Mitsubishi Fuso" брэндийн нийт 12 автомашиныг худалдан авч байлаа.
Энэ удаад ачаалал даах чадвартай, аюулгүй ажиллагаатай “Fuso canter” маркийн 4.5 тонн даацтай автомашинаар парк шинэчлэлтээ хийж байна. Тус автомашины хувьд манай орны замын нөхцөлд тохирсон, туулах чанар өндөртэй, ачааны бүхээг нь маш сайн хүчитгэсэн, шингэн хүнс тээвэрлэхэд зориулсан, зохих харьцаа бүхий хэмжээг сонгож хийсэн зэрэг давуу талуудтай.
Өмнөх худалдан авалтаас харахад автомашин маань тонн даац ихтэй, хэрэглэгч, харилцагчдадаа бэлэн бүтээгдэхүүнийг шууд хүргэхэд стандарт шаардлагыг хангаж байсан. Тиймээс “МСМ Групп” ХХК-ийг дахин сонгож, автомашинуудаа улам сайжруулан хүлээн аваад байна.
Бид Voyage брэндийн савласан цэвэр усыг борлуулалтын зургаан сувгаар 5000 гаруй харилцагчийг хамран бүтээгдэхүүнээ түгээдэг. Харин парк шинэчлэл хийснээр борлуулалтын сувгаа өргөжүүлж шинэ харилцагчдадаа түргэн шуурхай хүргэхэд бэлэн боллоо.
Мөн нийгмийн хариуцлагаа хэрэгжүүлэх хүрээнд ажилтнуудынхаа ажиллах нөхцөлийг сайжруулах, улмаар агаарын бохирдлыг бууруулахад тээврийн хэрэгслийн парк шинэчлэл нь чухал нөлөөтэй. Ингэснээр бизнесийн үйл ажиллагаагаа дэмжих, өсөлтийг хангах зорилгоор харилцагч, хэрэглэгч түншүүддээ бүтээгдэхүүнээ хурдан шуурхай хүргэх боломжоо тэлж буй юм" гэв.
“МСМ Групп” ХХК-ийн техникийн зөвлөх Б.Хишигцоож “Манайх Япон улсын "Mitsubishi" компанийн "Fuso canter" брэндийн Монгол дахь албан ёсны төлөөлөгч бөгөөд олон улсын хүнсний тээврийн чанар стандартад нийцсэн автомашиныг зах зээлд нийлүүлдэг. Тодруулбал, монголын хамгийн анхны савласан цэвэр усны ууган үйлдвэр "Эм Жи Эл Акуа компани Voyage брэнд" болон М-Си-Эс Кока-Кола ХХК, Сүү ХК зэрэг томоохон компаниудтай хамтран ажиллаж байна.
Учир нь "Mitsubishi Fuso" брэндийн “Fuso canter” маркийн автомашин бол маш сайн чанарын автомашин бөгөөд 365 хоногт хүнд даацын ачаа тээвэрлэхэд ямар нэгэн эвдрэл гэмтэл гардаггүй. Манай харилцагч байгууллагууд маань энэ давуу талыг нь гол болгож сонгон хэрэглэдэг биз ээ.
Мөн бид засвар, сэлбэг зэрэг бүх хэрэгцээт үйлчилгээг нь ханган ажилладаг тул хүнсний үйлдвэр, түгээлтийн компаниуд маань хэрэглэгчдэдээ бүтээгдэхүүнийг түргэн шуурхай хүргэх боломжоор ханган хамтарч байна.
Бид “Эм Жи Эл Акуа” ХК-тай хоёр дахь удаа парк шинэчлэлээр хамтран ажиллаж буйдаа баяртай байна” гэлээ.
"Эм Жи Эл Акуа" ХК-ийн жолооч Д.Лхагвадорж “Би компанидаа найм дахь жилдээ ажиллаж буй. Анх ажилд ороод “Hyundai Mighty” маркийн автомашин барьдаг байсан.
Манай компани ажилчдадаа зориулан тав тухтай орчин бүрдүүлэх, мөн хэрэглэгчдэдээ өндөр чанартай цэвэр усыг хүргэх зорилгоор 2022 онд тээврийн хэрэгслүүдээ шинэчилж ажилласан юм. Ингэснээр би шинэ автомашины жолооч болж байлаа.
“Fuso canter” автомашин бол хүчтэй, даац сайтайгаас гадна эвдрэл гэмтэл бага гардаг нь давуу талтай. Энэ нь жолооч хүний хувьд ажлаа амар тайван, санаа зовнилгүй, саадгүй, хурдтай үргэлжлүүлэх гол тулгуур болдог.
Нөгөө талаас, хүнс бол хүний анхдагч хэрэгцээ учраас хэрэглэгч, харилцагчдадаа бүтээгдэхүүнээ цаг алдалгүй хүргэх нь их чухал. Тиймээс бүтээгдэхүүн тээвэрлэх хэрэгсэл хэвийн ажиллагаатай, хүчин чадал сайтай байхыг шаарддаг.
Мөн хүнсний бүтээгдэхүүн тээвэрлэж буй тул эрүүл ахуй, хадгалалтын стандарт хангасан тээврийн хэрэгсэлтэй байх ёстой. Энэ бүх шаардлагыг хангаж, чаддаг тул автомашиндаа сэтгэл хангалуун байдаг юм.
Хамгийн чухал нь хэрэглэгчид маань өндөр чанартай хүнсээр хангагдаж байна гэж бодохоор сайхан санагддаг.
Компани маань дахин парк шинэчлэл хийснээр цоо шинэ автомашиныхаа түлхүүрийг өнөөдөр гардаж аваад их баяртай байна. Шинэ тээврийн хэрэгсэл бол байгаль орчиндоо бохирдол бага гаргах зэрэг давуу тал их” хэмээн сэтгэгдлээ хуваалцлаа.
Эх сурвалж: Gogo.mn
